Делницата Катланово – Велес во завршна фаза

Небезбедни, стари, темни патишта, речиси без патна сигнализација и згора на тоа во делови налик на депонии. Потоа, неосветлени тунели, стари наплатни рампи на запуштени патарини. Ова е состојбата на дел од македонските автопатишта. Ќе заличат ли на европските?

Секако, ако некој сериозно се заложи да го реши проблемот, но не со ветувања туку на терен со факти- а за тоа е потребно време.

 Во последните неколку месеци сведоци сме на промени.

Делницата Катланово – Велес е во завршна фаза. Да убеди, со екипата на Канал 5 на терен излезе и директорот на Агенцијата за државни патишта Љупчо Георгиевски. Се рехабилитираат 28 километри делница од автопатот Коридор 10.

Се осветлуваат тунелите, се заштитуваат критичните места со одрони за поголема безбедност.

– Тоа се овие три тунели од оваа делница, веќе се распишани тендери за нивно средување, голем дел од нив се завршени. Секако наидуваме во временски период кој што малку е полош, најверојатно за 10 дена ќе се отпочне со осветлување на тунелот поголемиот на влезот во Скопје од Велес кон Скопје, а сигнализацијата и бојадисување ќе ја оставиме за два месеци зависно од временските услови, вели Љупчо Георгиевски, директор на Агенцијата за државни патишта.

Додека да се автоматизираат се средуваат и патарините. Светлосна сигнализација, монитори за наплата, хортикултурано уредување.
Од октомври патарините преминаа во надлежност на Агенцијата за државни патишта. За само два месеци наплатата е зголемена за 14,6%.

Ќе се осветлуваат и поголемите клучки од Коридорот 8 и 10, кај Велес, Хиподром, Желино. Ќе има повеќе места за одмор со тоалети.

– Деновиве се отпочна активноста за проектирање и сметаме дека од пролет првата фаза на реализација на тој проект делницата од Велес до Кадрифаково со должина од 28 км под итно ќе треба да се рехабилитира, а тоа значи од постојните 6 метри кои што се во овој момент ќе треба да се прошират на 11 метри од таа траса и да добие две ленти по 3,5 метри и две по 2,5 метри. Така да имаме еден побезбеден сообраќај бидејќи таму имаше повеќе црни точки и сообраќајни незгоди на таа делница, вели Георгиевски.

Но она што е огледало на една нација е „свеста за чиста околина“- очигледно ја немаме. Агенцијата за патишта ќе ја подига свеста кај патниците со информативни табли преку кои ќе апелира да не се фрлаат кеси, пластични шишиња и други отпадоци со кои во моментов патиштата изгледаат на депонии.

 

Извор: www.kanal5.com.mk

Автопатот од Приштина до Блаце ќе чини 793 милиони евра

Изградбата на 55 километарскиот автопат, кој ги поврзува Косово и Македонија, ќе чини 793 мииони евра. Трасата, која не е ни пола должина од автопатот Врмица-Мердаре, ќе има три тунели и десеттина мостови, јави порталот Албеу. Проектот е изготвен во 2010 година а изградбата се планира да почне во почетокот на 2013, за која цел косовската влада со буџетот за наредната година издвои 30 милиони евра.

Автопатот не почнува од Приштина, туку од Липљан каде ќе има голем кружен тек, кој ќе биде и прва клучка на автпатот кој ќе го поврзува косовскиот главен град со граничниот премин Блаце, на границата со Македонија. Со цел трасата да добие што подобра насока, реката Лепенец ќе биде пренасочена.

Владата во Приштина со Светска банка се очекува на почетокот на наредната година да ја финализираат физи- билити – студијата, како предуслов за почеток на реализација на проектот.

Косово треба  да има 300 милиони евра на банкарскиот биланс, како услов да почне со изградба на автопатот. Во билансот на крајот од оваа година, се очекува да има 200 милиони евра, што подразбира дека во банкарскиот биланс треба да се слеат пари и од приватизациите за да се исполни условот од 300 милиони евра.

Максимална дозволена брзина на автопатот ќе биде 120 километри на час, а најголемиот тунел ќе биде кај Качаник, со должина од 2,2 километри.

 

Извор: www.dnevnik.com.mk

Кои патни правци се затворени за товарни возила?

Поради интензивни снежни врнежи забрана за движење на тешки товарни возила има на патниoт правeц Дебар-Струга, а од 17:15 часот воведена е забрана за движење на тешки товарни возила и на патниот правец Струга – граничен премин Ќафасан.

Сообраќајот на останатите магистрални и регионални патни правци се одвива тековно во зимски услови, без забрани, застои и ограничувања.

Слаби врнежи од снег се бележат на сите останати повисоки места во западниот и југозападниот дел од државата каде што коловозите се претежно влажни, на места со остатоци од кашест снег.

Дежурните екипи на ЈП „Македонија пат“ се на терен и редовно ги контролираат и расчистуваат сите патни правци.

 

Извор: www.kurir.mk

Вимателно да се вози поради одрони.

Синоптичарите прогнозираатоблачно време со врнежи од дожд низ целава земја на места и до 20 литри на метар квадратен. Температурите ќе се движа до 15 Целзиусови степени.

Сообраќајот на сите магистрални и регионални патни правци низ државата се одвива без забрани, по влажни коловози поради врнежи од дожд во целата земја.

Поголема внимателност се препорачува на патните правци Дебар – Струга, Маврово – Дебар, Катланово – Велес и Демир Капија – Удово каде има почеста појава на одрони. Низ клисурите и на повеќето мостови долж речните текови има појава на утринска магла.

На магистралниот пат Катланово – Велес, каде се одвиваат работи за реконструкција на автопатот да се вози внимателно.

 

Извор: www.kanal5.com.mk

Модерна магистрала ќе ги поврзе Радовиш и Струмица.

Радовиш и Струмица ќе се поврзат со модерна магистрала која ќе овозможи побрз проток и побезбеден сообраќај. Се очекува овој патен правец да биде пуштен во употреба во јануари наредната година.

Патниот правец е во должина од 10 километри на кој е предвидено брзина на движење од 100 километри, наместо досегашните 40 километри што ги овозможува постоечкиот патен правец. Како се одвиваат работите на терен денеска се информираа вицепремиерот и министер за финансии Зоран Ставрески заедно со министерот за транспорт и врски Миле Јанакиески и директорот на Агенцијата за државни патишта Љупчо Георгиевски.

– Патниот правец од Радовиш до Струмица е ветување за граѓаните во овој дел. На терен се работи во полна пареа. Агенцијата за државни патишта и изведувачот „Гранит“ и во наредните неколку недели ќе продолжат со интензивно темпо на изградба и на почетокот на следната година ќе се заврши овој патен правец. Калдрмата ќе биде минато, а овој модерен пат ќе биде иднината која ќе помогне за граѓаните од овој регион да се возат безбедно и да имаат полесен пристап до Штип, па и до Скопје, изјави вицепремиерот Ставрески.

Тој најави дека во наредните четири години во патната и во железничката инфраструктура ќе се реализираат крупни проекти. Притоа посочи дека по насока од Владата Агенцијата за државни патишта ќе изготви проект за проширување и на патниот правец Велес – Кадрифаково на кој се случуваат сообраќајни несреќи бидејќи е тесен. Агенцијата треба да изработи проект во кој ќе предвиди патен правец широк 11 метри со две главни и две помошни ленти со што ќе се зголеми безбедноста и на овој патен правец и ќе се олесни патувањето на тој дел од Република Македонија. Во делот на источниот дел од земјава, како што рече министерот, има интензивна изградба и ќе има и во наредниот период.

Говорејќи за инфраструктурните проекти во наредните четири години, вицепремиерот Ставрески истакна дека е отворен градежен фронт, дека се работи на автопатот Демир Капија – Смоквица како еден од најголемите проекти што ќе се реализираат во наредните неколку години и дека Владата настојува да обезбеди финансиска конструкција и средства за реализација на автопатите кои беа најавени од Кичево до Охрид и од Миладиновци до Штип.

Тој изрази надеж дека ќе се обезбеди и концесионер за делниците од Гостивар до Кичево и од Скопје до Блаце, бидејќи станува збор за патни правци каде што има поголем проток на возила и од тој аспект се поатрактивни за концесија.

Владата ќе продолжи, како што најави министерот, и на реализација на проектите за изградба на регионални и локални патишта.

Патниот правец Радовиш чини 445 милиони денари, средства обезбедени од Буџетот на Република Македонија и градежните работи ги извршува „Гранит“ откако е раскинат договорот со претходниот изведувач поради доцнење со роковите (хрватска ИНГРА).

 

Извор: www.kurir.mk

Ќе се градат автопати помогнати од Кина

Изградба на автопатска делница Миладиновци – Штип и надградба на патната делница Штип – Кочани, како и изградба на автопат Кичево – Охрид и на патот Охрид – Св. Наум, се приоритетни инфраструктурни проекти за македонската Влада што треба да ги реализира преку соработка и поддршка со Владата на Народна Република Кина.

Меѓудржавниот договор денеска во Скопје го потпишаа министерот за транспорт и врски Миле Јанакиески и кинескиот амбасадор во Скопје Цуј Џивеи.

– Со Договорот се дава приоритет на изградбата на инфраструктурните проекти, односно патна и железничка мрежа, мостови, електроенергетски и телекомуникациски објекти и активно се охрабрува соработка помеѓу банките и компаниите во двете држави со цел непрекината и успешна соработка, рече министерот Јанакиески по потпишувањето на договорот.

Според него, паралелно ќе се работи на изградбата на сите планирани делници, но најбргу може да се почне со автопатот Миладиновци – Штип за кој веќе е изготвен финален проект и е почнат процес за експропријација. На ниво на автопат ќе биде и патот Кичево – Охрид, за кој исто така веќе се изготвени проекти, а за патот Охрид – Св. Наум Агенцијата за државни патишта во наредните две години треба да изготви проектна документација.

За финансирање на делниците се планира да се искористат дел од 10 милијарди евра што ги најави кинеската Влада за развој на Југоисточна Европа, со кредитирање преку кинеската Експорт импорт банка. Динамиката и димензионирањето на тие проекти, според Јанакиески, ќе биде согласно Стратегијата за надворешниот  долг на Република Македонија.

– Моментно Владата на НР Кина најави дека имаат на располагање 10 милијарди евра наменети за развој на земјите од Југоисточна Европа, но можеби  во иднина ќе има и други можности  за развој на инфарструктурата. За патот Миладиновци – Штип нашата тенденција е да искористиме дел од тие 10 милијарди евра, а во иднина можеби ќе има и други  поповолни линии или друг начин на финансирање. Во конкретниот случај  за тие 10 милијарди евра се работи за  многу поволно кредитирање од кинеската Ексим банка, појасни Јанакиески.

Владата, укажа, сака да се реализираат сите приорити, но мора да се исполнат сите услови согласно Стратегијата за надворешниот долг, капацитетот на двете држави и сите останати мерки што ќе бидат преземени во иднина.

– Како  држава се уште сме во границата на ниско задолжени земји, но сепак треба да се почитува Статегијата за надворешниот долг во РМ при евентуални кредити за изградба на инфраструктурата. Но, овие проекти се наш приоритет и во соработка  со Министерството за финансии и вицепремиерот за економски прашања Владимир Пешевски ќе утврдиме динамика, бидејќи паралелно Министерството за транспорт  и врски со Министерството за финансии работи и на обезбедување  средства за изградба на Коридорот 8 кон Бугарија  и за гасификацискиот систем, појасни Јанакиески.

Кинескиот амбасадор во Скопје оцени дека договорот е резултат на долги подготовки и разговори помеѓу двете влади и претставува можност за продлабочување на соработката.

Договорот за соработка, меѓу другото, опфаќа и техничка помош од експерти, професионалци специјализирани за обука на домашни лица за изработка на развојни планови и други работи поврзани со инфраструктурните проекти, одржување тренинг курсеви, набавка на машини, опрема и материјали, размена на искуства  за сигнализација и интегрирани системи…

 

Извор: www.denesen.mk

Владата планира да гради нови автопати

Владата планира да гради три нови автопати во следнте пет до шест години. Како што дознава ekonomski.mk,  инвестицијата e вредна од 600 до 800 милиони евра.

Изградбата на автопатиштата планирано е  да се реализира преку јавно приватно партнерство со кинески компании.

Еден од автопатиштата треба да се гради на потегот Миладиновци-Свети Николе- Штип. За него според првичните анализи потребни се околу 250 милиони евра и се разгледува опцијата автопатот да биде со две или четири ленти.

Вториот автопат се планира да се гради од Гостивар до Кичево и да биде  во две насоки. За третиот се уште се размислува но веројатно ќе биде во источниот дел на Македонија  за да се поврзе со Коридорот 8.

Средства за најавените инфраструктурни проекти ако се реализраат ќе се обезбедат преку ЕКСИМ кинеската банка за поддршка.

 

Извор: www.kurir.mk

СОСТОЈБА НА ПАТИШТАТА ВО МАКЕДОНИЈА

четврток, 8 ноември 2012 13:05:00

СОСТОЈБА ВО МАКЕДОНИЈА: Сообраќајот на сите магистрални и регионални патни правци низ државата се одвива без забрани, по наместа влажни коловози. ВНИМАТЕЛНО: Посебна внимателност на патните правци Дебар – Струга, Маврово – Дебар, Катланово – Велес и Демир Капија – Удово, каде можна е појава на одрони кои може да го попречат движењето на возачите. РАБОТА НА ПАТ: Г.Д. Гранит почнувајќи од 24.09.2012 изведува рехабилитација на магистралниот пат М-1 – делница Катланово-Велес. Сообраќајот од две коловозни ленти се пренасочува во една. Периодично сообраќајот се одвива во левата, а потоа во десната коловозна лента. ФРЕКВЕНЦИЈА: Интензитетот на сообраќај на патните правци надвор од градските средини е умерен. ГРАНИЧНИ ПРЕМИНИ: На граничните премини нема подолги задржувања за влез и за излез од државата.

Извор: www.amsmspi.mk/mk/sostojba.asp

Потпишан договор со ИФЦ за патарините на патниот правец Скопје-Гостивар-Кичево

Министерството за транспорт и врски денеска соопшти дека е потпишан      договор со Меѓународната финансиска корпорација (ИФЦ) за советодавни услуги во однос на реализацијата на предвидениот проект за изградба, одржување и наплата на патарини на патниот правец Скопје-Гостивар-Кичево, кој е дел од патниот Коридор 8 во Република Македонија.

Целта на договорот е обезбедување консултантски услуги и изработка на студии и анализи. Согласно текстот, ИФЦ ќе има обврска до Владата на Република Македонија да предложи модел за имплементација на проектот за концесија на патниот правец Скопје-Гостивар–Кичево и да биде трансакциски консултант на Владата се до склучување на договор со потенцијалниот најповолен понудувач. ИФЦ ќе биде задолжена да и асистира на Владата во структурирање на проектот и подготвување на транспарентен, фер и компетитивен процес за привлекување приватен партнер за изведување на проектот по модел на јавно-приватно партнерство.

Со договорот, како што се наведува во соопштението, се предвидува во временска рамка од 14 месеци до две години да бидат имплементирани две фази на овој проект, кој треба да заврши со избор на најповолен понудувач.

За време на изведување на првата фаза од проектот, ИФЦ ќе треба да ги разгледа и направи анализа на сите релевантни информации кои се однесуваат на концесијата на патиштата, да изготви техничко-сообраќајна анализа, детален финансиски модел, испитување на пазарот и изработка на препорачлива структура за имплементација.

Доколку по оваа фаза бидат прифатени изготвените студии ќе се имплементира втора фаза од проектот во која од страна на ИФЦ ќе се промовира моделот за концесија, ќе се асистира во фазата на претквалификација, изработка на тендерска документација, преговорите со претквалификуваните компании и во завршување на тендерската постапка со избор на најповолниот понудувач и склучување на договор.

Меѓународната финансиска корпорација (ИФЦ), која е член на Светска банка, е најголемата глобална развојна институција, фокусирана исклучиво на приватниот сектор во земјите во развој и финансира и обезбедува советодавни услуги кои се однесуваат на проекти основани на јавно-приватно партнерство, а преку својата советодавна активност им помага на владите да создадат услови кои го стимулираат вливањето на домашни и странски приватни инвестиции.

Извор: www.sitel.com.mk